Nga 12 deri më 13 mars 2025, në Torino, Itali, u mbajt Konferenca me titull „Ndërkombëtarizimi i ekselencës profesionale – Ta bëjmë ekselencën të vlefshme për të gjithë nxënësit“, si pjesë e një projekti të financuar nga Bashkimi Evropian, i zbatuar nga Fondacioni Evropian për Trajnim (ETF) në emër të Komisionit Evropian.

Në konferencë morën pjesë mbi 100 aktorë kyç në fushën e arsimit dhe aftësimit profesional, përfshirë përfaqësues të Komisionit Evropian, ministrive të arsimit, si dhe organizata dhe shoqata të shumta për arsim profesional si: ETF, UNESCO/UNEVOC, EVTA, EfVET, EVBB, EURASHE, EUCEN, EUproVET, SERP, CEDEFOP, si dhe përfaqësues të Qendrave Rajonale të Ekselencës Profesionale nga vendet anëtare të Rrjetit Evropian të Ekselencës. Në konferencë mori pjesë aktive edhe SHMSH–QARSO „Kiro Burnaz“ nga Kumanova, përmes përfaqësuesit të saj – udhëheqësit të Sektorit për Rrjetëzim dhe Bashkëpunim Ndërkombëtar.

Qëllimi i konferencës ishte prezantimi i risive, mjeteve dhe shërbimeve mbështetëse në fushën e ekselencës profesionale. Duke pranuar se ekselenca profesionale është një përpjekje kolektive, konferenca ofroi mundësi për diskutim dhe ndërveprim, angazhim me ekspertë, ndarje njohurish dhe bashkëpunim në formësimin e së ardhmes së ekselencës profesionale. Në një botë që ndryshon me shpejtësi, reformat në arsimin dhe aftësimin profesional po bëhen gjithnjë e më të rëndësishme. Iniciativa e Unionit të Aftësive fokusohet në investime, mësim gjatë gjithë jetës dhe njohjen e aftësive, me qëllim përmirësimin e konkurrueshmërisë dhe tejkalimin e mospërputhjes së aftësive dhe kompetencave profesionale në BE. Konferenca u përqendrua gjithashtu në mundësitë që Qendrat e Ekselencës Profesionale (CoVEs) të marrin pjesë në këto reforma dhe të kontribuojnë në përmbushjen e kërkesave të tregut të punës.