Në periudhën nga 25 deri më 27 shtator 2024, në ambientet e SHMSH–QARSO „Kiro Burnaz“, u mbajt punëtoria përmbyllëse në kuadër të projektit kërkimor UNESCO/UNEVOC „Bridging Innovation and Learning in TVET“ – Ndërtimi i urave ndërmjet inovacionit dhe të nxënit në arsimin dhe aftësimin teknik-profesional.
Ideja e projektit lindi si rezultat i iniciativës së përbashkët të Sektorit për Rrjetëzim dhe Bashkëpunim të SHMSH–QARSO „Kiro Burnaz“ nga Kumanova dhe Qendrës Shkollore Nova Gorica nga Republika e Sllovenisë, në përputhje me memorandumin e bashkëpunimit ndërmjet dy institucioneve. Kjo iniciativë e përbashkët u njoh dhe u mbështet nga rrjeti UNESCO/UNEVOC për arsim dhe aftësim profesional, përmes projektit BILT (Bridging Innovation and Learning in TVET), i zhvilluar nën patronazhin e Institutit Gjerman për Arsim dhe Aftësim Profesional (BIBB) dhe Ministrisë Federale Gjermane për Arsim dhe Kërkim Shkencor.

Ky projekt i mundësoi Sektorit për Zhvillim, Kërkim dhe Inovacion pranë SHMSH–QARSO „Kiro Burnaz“ të drejtën ekskluzive për përdorimin e mjetit online për vetë-reflektim (Self-Reflection Tool – SRT), me qëllim hulumtimin e kapaciteteve të institucioneve të arsimit dhe aftësimit profesional për identifikimin e aftësive dhe kompetencave kyçe sipas nevojave të tregut të punës, si dhe integrimin dhe zbatimin e tyre në programet mësimore, mësimin teorik dhe trajnimin praktik.

Në punëtori morën pjesë Felister Waniaga Munyi, përfaqësuese e UNESCO/UNEVOC nga Bonni, Gjermani, Adrijana Hodak dhe Tjaša Petelin Bačar, përfaqësuese të Qendrës Shkollore Nova Gorica nga Republika e Sllovenisë, si dhe përfaqësues nga të gjitha grupet kërkimore të përfshira në projekt: bashkëpunëtorë të jashtëm nga sektori privat dhe publik (kompani me të cilat SHMSH–QARSO „Kiro Burnaz“ bashkëpunon në mësimin përmes punës), përfaqësues nga Ministria e Arsimit dhe Shkencës, Qendra për Arsim Profesional, Qendra për Arsimimin e të Rriturve, njësia rajonale e Agjencisë së Punësimit, si dhe përfaqësues i projektit Education for Employment E4E – Helvetas, i cili është një mbështetës i rëndësishëm i zhvillimit të qendrave rajonale të arsimit dhe aftësimit profesional. Gjithashtu, në punëtori morën pjesë përfaqësues të menaxhmentit të shkollës, mësimdhënës dhe nxënës.

Në kuadër të punëtorisë u prezantuan rezultatet e hulumtimeve të realizuara përmes anketave, u zhvilluan diskutime dhe analiza të pikave të forta dhe mundësive, si rezultat i së cilave u hartuan dy dokumente kyçe që rrjedhin nga ky projekt: Analiza e Pikave të Forta dhe Mundësive dhe Plani i Veprimit për zbatimin e aktiviteteve. Këto dokumente do të shërbejnë si bazë për zhvillimin e mëtejshëm të kapaciteteve të SHMSH–QARSO „Kiro Burnaz“, në drejtim të krijimit të një ekosistemi më të mirë të aftësive dhe kompetencave në marrëdhënien institucion i arsimit dhe aftësimit profesional – tregu i punës.