Në ambientet e SHMK–QRATP „Kiro Burnaz“ Kumanovë u mbajt një prezantim me temë „Punë e sigurt me traktor dhe makineri të bashkëngjitura“. Në këtë prezantim morën pjesë mësimdhënës nga shkollat e mesme me drejtim bujqësor-veterinar nga Republika e Maqedonisë së Veriut, mësimdhënës nga SHMK–QRATP „Kiro Burnaz“, përfaqësues të kompanive me të cilat shkolla bashkëpunon, përfaqësues nga Auto Maqedonia, përfaqësues nga auto-shkollat, nga vetëqeverisja lokale si dhe prodhues bujqësorë.

Prof. dr. Dragi Tanevski realizoi prezantimin e Programit Evropian për „Punë të sigurt me traktor dhe makineri të bashkëngjitura“, ku u trajtuan disa njësi tematike, ndër të cilat:

– standardet dhe rregulloret evropiane për sigurinë në punë në bujqësi;

– bazat e menaxhimit të sigurt të traktorëve dhe makinerive të bashkëngjitura;

– rreziqet, lëndimet më të shpeshta dhe masat parandaluese;

– përdorimi i pajisjeve personale mbrojtëse;

– modele trajnimi dhe rekomandime për integrimin e programit në procesin mësimor;

– shembuj praktikë dhe përvoja nga vendet anëtare të Bashkimit Evropian.

Prezantimi u shoqërua me materiale të përgatitura në mënyrë profesionale dhe shembuj vizualë, të cilët kontribuuan në paraqitjen e qartë të aspekteve kyçe të programit.

Në pjesën e dytë të ngjarjes, nga ana e shkollës u prezantua një Iniciativë për ndryshimin e rregullativës ligjore me temë: „Ulja e kufirit të moshës për marrjen e lejes për drejtimin e traktorit (kategoria F) nga 17 në 16 vjet“, me qëllim që nxënësit e drejtimit bujqësor-veterinar dhe mekanik (të moshës 16–17 vjeç) të kenë mundësi të drejtojnë traktorin në mënyrë të pavarur.